Κρωμέτ'κα Τραγωδίας - Δημώδη άσματα Κρώμνης Πόντου αφιερωμένα στο λήμμα “Ανάθεμα” (Δημητρίου Κ. Παπαδόπουλου Σταυριώτη). Λαογραφικόν Περιοδικόν Ποντιακή Εστία (1950)
Κρωμέτ'κα Τραγωδίας - Δημώδη άσματα Κρώμνης Πόντου αφιερωμένα στο λήμμα “Ανάθεμα”
Ανάθεμα το διάταγμα σ’ και την στράταν ντο δείκ’ς ‘με
θα πάγω ‘κ̆ι θα κλώσκουμαι, θ’ αραγεύ’ς ‘κ̆ι θ’ ευρίκς ‘με.
Παρακολουθείστε το αφιερωματικό μου βίντεο
Ανάθεμά τον π’ έλεγεν η ξενιτιά καλόν έν’
‘ς σον σεβταλήν τον άνθρωπον πολλά φαρμακερόν έν’.
Αναθεμά την μάνα σου, τον κύρ΄εσέν’ π’ εποίναν’
ποίκανε ‘σε παντέμορφον, σ’ εμέν’ πελι͜άν εδίναν.
Αναθεμά σε νέκουτζη, διπρόσωπος πως είσαι,
με τ’ εμέν’ λές και μασχαρεύς, με τ’ άλλους στρώντς και κ̆είσαι.
Ανάθεμα, ανάθεμα κόρη τ’ εσόν την μάναν,
‘κ̆’ εφήκε ‘με να χ̆αίρουμαι με τ’ εσέναν εντάμαν.
Ανάθεμά, ανάθεμα και διπλαναθεμά ‘σε,
σην ψ̆ή σ’ ελιγοθύμανα και σ’ έλεγες κοιμάσαι.
Ανάθεμά και το ρακίν ασ’ ‘ς όλον το καλλίον,
τ’ εκατό τράμα̤ έν’ πολλά, τ’ ημ’σόν οκά ελίγον.
Ανάθεμά τον π’ έχτιζεν τη ξενιτιάς τον δρόμον,
Χριστιανός αν έτονε, νά̤ πίστ’ είχ̆εν, νά̤ νόμον.
Ανάθεμα την μάνα σου την τσούναν την Εβραίϊσαν,
‘κ̆’ εφέκε ‘μ ν’ ελέπω ‘σε, μίαν αναλλαγμέντσαν.
Ανάθεμα τον π’ έβαλεν τ’ εμόν τ’ όνομα Γιάννε,
ο Θόν ας είχ̆εν πάρ’ την ψ̆ή μ’, εσέν’ να μ’ είχ̆α ‘διάναι.
Ανάθεμα και τα μακρά και τ’ απιδεβασέας,
εγόμωσαν το καρδόπο μ’ τέρτ͜ια και πικρασέας.
Ανάθεμα σε νέκουτζη έ….τζιακλα̤ροματία,
με τα τζα̤κλάρα̤ τ’ ομμάτα̤ σ’ έκαψες την καρδία μ’.
Ανάθεμα ατό το τζαρτζάφ’ ντο κρύφτ’ τ’ εσά τα κάλλα̤,
και ‘κ̆΄επορούν να χ̆αίρουνταν το μπόϊ σ’ τα παλληκάρα̤.
Κρωμέτ'κα Τραγωδίας - Δημώδη άσματα Κρώμνης Πόντου (Δημητρίου Κ. Παπαδόπουλου Σταυριώτη). Λαογραφικόν Περιοδικόν Ποντιακή Εστία (1950). Στην ενότητα αυτών των βίντεο με τίτλο "Κρωμέτ΄κα Τραγωδίας" θα παρουσιαστούν παλιά δίστιχα της Κρώμνης, αφενός για να θυμηθούν οι παλιότεροι και αφετέρου για να μάθουν οι νεότεροι, ώστε να πατούν προσεκτικά πάνω στα βήματα των προγόνων, υιοθετώντας τον τρόπο σκέψης και γραφής των παραδοσιακών μας δημοτικών τραγουδιών. Κρώμνη Πόντου (Korom Korum Trabzon) Ιστορία Λαογραφία Πολιτισμός. Χωριά, Τοπωνύμια, Ήθη, Έθιμα, Θρύλοι, Παραδόσεις, Χοροί, Πρόσωπα.
Ποντιακή Ιστορία & Λαογραφία – Βασίλειος Β. Πολατίδης – www.kotsari.com
