Κρωμέτ’κα Τραγωδίας Αφιερωμένα στην Παναγία Σουμελά - Συλλογή Γεώργιου Κανδηλάπτη (Κάνι)
Η Σουμελά η Παναγιά έχει μακρέα σκάλας,
η κόρ’ τίναν εγάπανα έχει μακρέα τσάμα̤ς.
‘Σ ση Σουμελά την Παναγιά εχάσα την κλειδίτσα μ’,
μάννα, ρούξον κι αράεψον ε’ εμέν’ κιορέν νυφίτσαν.
Κρωμέτ΄κα Τραγωδίας 3ο - Για την Παναγία Σουμελά - Δημοτικά Τραγούδια Πόντου
‘Σ ση Σουμελά την Παναγιά βαρέα ρούζ’ η δύσα,
την κόρ’ τίναν εγάπανα εξέβεν σεβταλήσσα.
‘Σ ση Σουμελά την Παναγιά τραγώδα̤ και χαράντας,
εκεί σεβτάδες γίνουνταν καρδίας καμονάντας.
Σ ση Σουμελά την Παναγιά και ‘σ σην Αε-Βαρβάραν,
εγώ και η αγάπη μου έψ̆αμ’ έναν λαμπάδαν.
Ασ’ σην σεβτάν ερρώστεσα, εχάλασα την υεία μ’,
σ’ σου Σουμελά την Παναγιάν θ΄ ευτάω λειτανίαν.
Σουμέλα λέν’ την Παναγιάν, πολλά θαυματουργέσσα,
πότε θα στερεών’ εμέν’ την άχαρον την νέϊσσαν.
Χαντσούκα, για χαμαίλυνον και για θα χαμαιλύνω,
‘σ σην Παναγίαν ώμνυσα ασ’ σο νερό σ’ να πίνω.
‘Σ ση Σουμελά την Παναγιά εχάρτσα έναν κουνόπον,
να αξιών’ με ο Θεόν κ’ εφτάω έναν μωρόπον.
‘Σ ση Παναγίας τ’ όνομαν πίνε και τραγωδούνε,
παίρ’νε και τα μουράτα̤ ‘τουν και πολλά χρόνα̤ ζούνε.
‘Σ ση Σουμελά την Παναγιά έταξα ‘ναν κερόπον,
να φέρ’ κρεμίζ’ ‘σ σην αγκάλα̤ μ’ τ’ εμόν’ το τρυγονόπον.
‘Σ ση Σουμελά την Παναγιά επήγα ελειτουργέθα,
αρνί μ’ εσέν’ ενούνιζα ούσπου επήγα κι έρθα.
Κρωμέτ΄κα Τραγωδίας 11ο - Αφιερωμένα στην Παναγία Σουμελά - Γ. Κανδηλάπτη (Κάνι)
Δημοσιεύονται δίστιχα κατ’ επιλογήν από τα απειράριθμα που υπήρχαν και τραγουδιόντανε στον Πόντο για την Παναγία Σουμελά. Είναι ζήτημα εάν τραγουδήθηκε τόσο πολύ από το λαό, ένα θεϊκό πρόσωπο, όσο η Θεομήτωρ, της Παναγίας Σουμελά. Κρωμέτ'κα Τραγωδίας - Δημώδη άσματα Κρώμνης Πόντου. Λαογραφικόν Περιοδικόν Ποντιακή Εστία (1950). Συλλογή Γεώργιου Κανδηλάπτη (Κάνι). Στην ενότητα αυτών των βίντεο με τίτλο "Κρωμέτ΄κα Τραγωδίας" θα παρουσιαστούν παλιά δίστιχα της Κρώμνης, αφενός για να θυμηθούν οι παλιότεροι και αφετέρου για να μάθουν οι νεότεροι, ώστε να πατούν προσεκτικά πάνω στα βήματα των προγόνων, υιοθετώντας τον τρόπο σκέψης και γραφής των παραδοσιακών μας δημοτικών τραγουδιών.
Ποντιακή Ιστορία & Λαογραφία – Βασίλειος Β. Πολατίδης – www.kotsari.com
