Πουρνόβραδυν - Λαϊκές διηγήσεις (ανέκδοτο) Χαλδίας του Ιωάννη Αβραμάντη

Ίνας Κανέτες τζαρτζής ελάσκουτον ‘ς σα χωρία κι επούλ’νεν βελόνα̤, ζινύχ̌α κι άλλα ψιλοβολέας. Έτον και πολλά μασχαρά̤νος.

Έναν ημέραν λέει ίναν χωρέτεν: «Εσείν οι χωρέτ’ ντ’ ολίγον τρώτεν. Μίαν τρώτε όντας σκούστουνε ασ’ σο κρεββάτ’, κι επεκεί η ώρα 10-11 κές εφτά̤τεν έναν καφαλτίν, ύστερα αναμένετεν τέέέέέ πότε θα ίνεται τ’ ολημέρα να τρώτεν ολίγον κι άλλο και ξάν αναμένετεν τέέέέέ πότε θα βραδύν να τρώτεν και το βραδυνόν κι επεκεί τάάάάάχ ‘ς σο παρακάθ’ και μίαν πα όντας θα κείσνε κά’». «Μώσε, σ̌κύλ’ υιέ κι άμ’ εσείς ασ’ σ’ εμάς πολλά μη τρώτεν; Πε’ ‘με πόσον τρώτεν;». «Χμ..εμείς; Εμείς τρώμε πουρνόβραδυν, πουρνόβραδυν, πουρνόβραδυν…!»  Ανέκδοτο Χαλδίας – Ιωάννη Αβραμάντη "Πουρνόβραδυν"

"Πουρνόβραδυν" Λαικές διηγήσεις (ανέκδοτο) Χαλδίας του Ιωάννη Αβραμάντη - Πηγή: Ποντιακή Εστία 

Λεξιλόγιον
• Ίνας = ένας
• Κανέτες = κάτοικος της Κάνις (Κάνεως) αρχαία πόλις πλησίον της Αργυρούπολης που έλαβε το όνομα της από τον ποταμό Κάνι
• Τζαρτζής = πραματευτής - ψιλικατζής
• Ελάσκουτουν = περιφερόταν για να πουλήσει την πραμάτεια του
• Ζινύχ̌α = ματόχαντρα
• Ψιλοβολέας = ψιλοπράγματα
• Μασχαρά̤νος = αστείος – μασκαράς
• Χωρέτ = χωρικοί
• Σκούστουνε = σηκωνόσαστε – εγείρεσθε από το κρεβάτι
• Κές = κατά (10-11 κέσ’ = κατά τις 10-11)
• Εφτά̤τεν = κάνετε = παίρνετε
• Καφαλτίν = πρόγευμα - κολατσιό
• τέέέέέ & τάάάάά = μακρόσυρτα επιφωνήματα
• Ολημέρα = μεσημέρι
• Κείσνε κά’ = πέφτετε κάτω δηλαδή κοιμάστε
• Πουρνόβραδυν = μέρα – νύχτα, από το πρωϊ ως το βράδυ δηλαδή όλη μέρα

Διαλεκτολογία Πόντου - Ιστορία & Λαογραφία - Βασίλειος Β. Πολατίδης - www.kotsari.com