Το καλόν το κλίμαν & ’Σ σήν γλώσσα μ’ απάν’ κ̌είται.. Δύο ανέκδοτες διηγήσεις εκ Τραπεζούντος Πόντου του κ. Γ. Χιαλή

Το καλὸν τὸ κλῖμαν & ’Σ σήν γλῶσσα μ’ απάν’ κ̌είται.. Δύο ανέκδοτες διηγήσεις εκ Τραπεζούντος Πόντου του κ. Γ. Χιαλή

Το καλὸν τὸ κλῖμαν.
Ἕναν ἡμέραν σ’ ἕναν πανηγύρ’ ’ς σήν Χώτσ’ ἕνας Κατωγλίτες εἶπεν τῆ Κερασέτ’ς:
— ’Ἐσεῖς οἱ Κερασέτ’ πάντα κουρφεύκεσθεν, ντὸ ἔχ̌ετε καλὸν κλῖμαν, καί τὸ Κατώγλι ψυχοτόπ’ λέτ’ ατο. Αδὰ τερέστεν Κατωγλίτ’κα παληκάρα̤, τρανὰ καί χοντρὰ ἄμον θερία.
— Ψέμαν κ̌’ έν’ είπεν ὁ Τζαμάλτς ὁ Πάντζον. Το σωστόν ἀέτς ἔν’. Tα τσ̌αμέσ̌α, ἀπὲς ’ς σήν βάλταν τρανυν’νε.

……………………………………………………….

’Σ σήν γλῶσσα μ’ απάν’ κ̌είται.
’Ἐπῆγεν τ’ ’Ἀποστόλ’ ὁ Παναέτας ’ς σήν Πόλ’ νά κερδίζ’ καί νά ἔρται παντρευ’.
Ἐστάθεν ἕναν χρόνον καί πέντε μῆνας· παράς πρόσωπον κ̌’ εἶδεν. ’Ἐκλῶστεν, ἔρθεν.
— Ντ’ ἔποικες, ἐκαζάνεψες πολλά; ἐρώτεσαν ἀτον.
— Τιδὲν κ̌’ ἐποῖκα, εἶπεν. Ἕμαθα τά τούρκικα, τό κέρδος ἳμ ἀτὸ ἔτον.
— Γιὰ πές μας, πῶς λέγνε τό ψωμίν; εἶπαν ἀτον.
— Σιτσάκ.
— Σιτσάκ λέγνε τό ζεστόν.
— ’Ἐκεῖ ζεστὸν τρῶγν’ ἀτο, εἶπεν κ̌’ ἀφίνε νά κρυών’.
— Πῶς λέγνε τό πρόβαν; ’Ἐνοῦντσεν, ἐνοῦντσεν:
— Τό πρόβαν κ̌’ ἐξέρω, εἶπεν, ἅμα τ’ αἰγίδ’ κἄπως ἔλεγαν.
— Πῶς λέγνε τό κόπρον;
— Εστά, εστά, γουρπᾶν’τ’σ, εἶπεν, θὰ λέ’ ἀτο, ἀπάν ’ς σήν γλῶσσα μ’ κείται!

Το καλὸν τὸ κλῖμαν & ’Σ σήν γλῶσσα μ’ απάν’ κ̌είται.. Δύο ανέκδοτες διηγήσεις εκ Τραπεζούντος Πόντου του κ. Γ. Χιαλή Διαλεκτολογία Πόντου, Ιδιωματισμοί της Ποντικής Διαλέκτου, λήμματα, ερμηνεία, ετυμολογία, διηγήσεις, θρύλοι, μύθοι

Διαλεκτολογία Πόντου – Ιστορία & Λαογραφία – Βασίλειος Β. Πολατίδης – www.kotsari.com