Τ’ Όλγας το πιλάφ’- Ανέκδοτη διήγηση Πόντου - Συλλογὴ Γ. Τορνικίδη

Τῆ Κετὶπ τῆ Μιλτιάδη τῆ Σεϊρενέτε ἀδελφὴ Ὄλγα ἐπέμνεν ἕναν ἡμέρ’ σὸ σπήτ’ νὰ μαγειρεύ’ καὶ ν’ ἐφτάει τ’ ὁσπητὶ τὰ δουλείας κ’ οἱ ἀγούρ’ πάλ’ ἐπῆγαν σὸ καγάνεμαν.

Ὄλγα, ἀρτοὺκ νοικοκυρά, ἐσπόν’ξεν, ἐσύλεψεν, ἴντι͜αν ὁσπητῖ δουλείας ἔσαν ἐπετσ̌ιάρεψεν-άτα. Σὴν βραδὺν σουμᾶ ἐθέκεν ἀπάν σὸ τσ̌ιάχ τὴν τ̌έντσερην καὶ θὰ ἐφτάῃ πιλάφ’. Ἐπέρεν τὰ προυγούλια καὶ ἀέτς γομάτον ἄλωνι λιθάρια ἐγόμωσεν ατα σὴν τέντζερην ἔψεσεν καὶ ἐποῖκεν τὸ πιλάφ’ν άτς. Τοῦ βραδὺν ἐκάτσαν νὰ τρώγνε’ κούρτσ, κούρτσ, κούρτσ, τὰ τσ̌αγούλι͜α, ἀσὰ κοκία πολλὰ εἶναι, ἐσκώθεν ἀτότε ὁ Μιλτιάδης καὶ λέει-άτεν:
—Πάτσ̌η Ὄλγα, τεσὸν τὸ πιλὰφ’ ποὺ θὰ τρώει πρέπ νὰ ἔχ̌’ καὶ κοσάρας κουδοὺκ’ νὰ χωρίζ’ τὰ λιθάρια ἀσὰ κοκία. Ἔξερες τὸ φαῖν ντ’ ἐποῖκες, γιατὶ κ̌ι’ ἐφέρνες μας κι’ ἀπ’ ἕναν κουδούκ;
(Κατ’ ἀφήγησιν Σ. Πασαλίδη)

Λεξιλόγιον: Σεϊρενέτε = από τα Χ̌αιρροίανα / καγάνεμαν=θερισμό / ἐσύλεψεν=σφουγγάρισε / ἐπιτσ̌ιέρεψεν=ἐκανόνισε / τσ̌ιάχ’ = τζάκι / τέντζερης = χύτρα, κατσαρόλα / κούρτσ, κούρτς = ηχοποιημένη λέξη από τον ήχο που ακούγεται καθώς μασά κανείς την τροφή μαζί με πετραδάκια / κουδοὺκ=ράμφος / τσαγούλια = γνάθοι, σαγόνια / αρτούκ = τώρα 

Τ’ Όλγας το πιλάφ’- Ανέκδοτη διήγηση Πόντου - Συλλογὴ Γ. Τορνικίδη - Πηγή: Ποντιακά Φύλλα 1958

Διαλεκτολογία Πόντου - Ιστορία & Λαογραφία – Βασίλειος Β. Πολατίδης – www.kotsari.com