Λαογραφικά Γλωσσικά Σύμμεικτα - Ένας μύθος απο το Βατούμ

Είνας 'κοδέσπαινα επήεν 'ς σην κούχνην απέσ' να παίρ' ολίγον πλιγούρ' να πάει ευτάει έναν πιλάφ' και τρώνε. Άμαν εκειαπέσ' ελάγγεψεν είνας πεντικός έμπρια 'τ'ς κ' εχπάραξεν ατεν. «Αφορισμένε», είπεν, «εχπάραξες με, εγώ εσέν 'κι θ' αφήνω σε, θ ασκοτώνω σε.».

Ετέρεσεν αδά, ετέρεσεν ακεί, ηύρεν έναν στουράκ' κ' εκοβαλάεψεν ατον, να σκοτών' ατονε. Ο πεντικόν, μικρός, αλήγορος, έτρεξεν έτρεξεν, επήεν εσέβεν απέσ' ΄ς έναν αχερών' κ' εκρύφτεν απέσ' 'ς έναν αμπάρ' γομάτον κοκκία. Η 'κοδέσπαινα ξάν, «αφορισμένε, αναθεμά σε..Εγώ τέρεν, θα ευρήκω σε», κ' εβλαστήμανεν. Ο πεντικίτσον αποπέσ' εκουζτούρευεν ετέναν κ' έλεεν : «Να είσαι καλά 'κοδέσπαινα.Εκοβαλάεψες με κ' ερούξες με απέσ' 'ς σον παράδεισον.»

Θ. Κουρτζίας - Γεωργίας Πρώην Σοβιετικής Ένωσης - Από Βατούμ - Ιφιγένεια (Κική) χήρα Γ.Γεωργιάδη - Γενν, 1916 - Βατούμ - Ν. Κρώμνη Δράμας - Θεσσαλονίκη

Ποντι(α)κή Διαλεκτολογία & Λαογραφία - Βασίλειος Β. Πολατίδης - www.kotsari.com