Λαογραφικά Γλωσσικά Σύμμεικτα Κάρς: Κλέφτω το παπάχι μ' / Για απλού κά / Εγώ ατό εξέρω, ατό λέγω.

Κλέφτω το παπάχι μ'.
Ο Μαλαστρατίνον εξέβεν μίαν 'ς σο κυνήγ' και ΄ς σο κλεψίον. Αδακά επήεν, αλεικά επήεν, οτουρβαδής τιδέν ΄κ΄ εύρεν να φέρ' ΄ς σ΄οσπίτ΄. Ατώρα ντ΄α΄φτάη; Εβγάλλ΄το παπάχ'ν ατ' και βάλλ' ά αφκά ΄ς σο γολτούχ΄ν ατ'.

Όντες έρθεν ΄ς σ΄οσπίτ΄, λέει ατον η γαρή ατ' : Νέπε, ντ΄εύτας ατουκά; Γιατί βάλλτς το παπάχι σ' αφκά ΄ς σο γολτούχι σ' και κρύφς ά; Λέει κ΄ εείνος: Ντ' ά ΄ποίνα, τιδέν 'κ' εύρα να 'κλεφτα, για τ'ατό πα κλέφτω το παπάχι μ'.
Χαρίτων τη ποπά - Γιωσήφ

Για απλού κά
'Σ σο Κουπάν κιάν' ας τ' έμ'νες , δύ' Ρουσάντ' επούλ'ναν μήλα κ' ετζάϊζαν «γιάμπλουκα !!! ..γιάμπλουκα !!!..», τεμέκ, μήλα..μήλα.
Έκ'σαν ατς δύ' νομάτ' γαρήδες ας εμετέρτς και εδάν'ναν επεκέσ', αγνόν έρθεν ατς, λένε: «..Όϊ, τη σκύλλ' και τη γαϊδάρ' τα παιδία..!!! Αίκον δουλείαν πα είδες; Ασκιαρατάν πως λένε μας. γιά απλού κά.!!!...γιά απλού κά.!!!...ξάϊ εντροπήν 'κ' έχ'νε ατείν ;.
Σοφία τ' Αντών' τη Ταλήπανατα ( γενν. 1910)

Εγώ ατό εξέρω, ατό λέγω
Τον Νίκον επίασεν ατον ο ψύχον. Μίαν, δύο, είπαν τον τεττέν ατ' : «Πασά Κυρακέ, ο Σάββας τη Τσαούσ' κόφτ' τον ψύχον, εξέρ' το τροπάδ'» Επήεν έγκεν ατον. Λέει ο Σάββας : «Αλά μίαν ποίστε έναν φούστορον, ας τρώγω». Εποίκαν ατον κ' έφαεν. Επεκεί τεϊ λέει το τροπάδ' : «Ψύχον - μύχον κόψον τη Νίκονος τον ψύχον...Κι αν κόφς' ά, κόφς ά, κι αν 'κι κόφς ά πα, ΄ς σο σκατό μ' κιάν 'κι κόφς ά»
Ακούει άτον ο Κυρακόν, λέει «νέπε αφωρισμένε, ντο τροπάδ' έν' ντο λές;;;» «Εγώ , είπεν : «ατό εξέρω, ατό λέγω». Άμαν το φούστορον μίαν έφαεν.
Τζάνικας

Ποντι(α)κή Διαλεκτολογία & Λαογραφία - Βασίλειος Β. Πολατίδης - www.kotsari.com