Τη Τρίχας το γεφύρι – Δημώδες άσμα Χαλδίας Πόντου – Γεωργίου Κανδηλάπτη Κάνι

Written by Πολατίδης Βασίλειος. Posted in Δημώδη Άσματα

‘Σ σην γέφυραν, ‘ς σην γέφυραν, ‘ς ση Τρίχας το γεφύριν,
χ̌ίλοι μαστόροι έχτιζαν και μύροι μαθητάδες,
όλ’ την ημέραν έχτιζαν κι αποβραδής χαλάουτον,
οι μαστόροι εχ̌αίρουνταν θενά πλεθύν’ η ρόγα.

– Ντο δίς ‘με πρωτομάστορα, και στένω το γεφύριν;
- Αν δίγω ‘σε τον κύρη μου, άλλον κύρην πα ‘κ̌’ έχω,
αν δίγω ‘σε την μάνα μου, άλλο μανίτσαν ‘κ̌’ έχω,
αν δίγω ‘σε τ’ αδέλφα̤ μου, άλλ’ αδελφόπα ‘κ̌’ έχω,
αν δίγω ‘σε και τα πουλλά̤ μ’, άλλο πουλόπα ‘κ̌’ έχω,
αν δίγω ‘σε την κάλη μου, καλύτερον ευρήκω. Τη Τρίχας το γεφύρι – Δημώδες άσμα Χαλδίας Πόντου – Γεωργίου Κανδηλάπτη Κάνι.

Παραλλαγή
Ατού ‘ς σην Αρδασόπολιν, ΄ς ση Τρίχας το γεφύρι,
χ̌ίλοι μαστόροι έχτιζαν και μύροι μαθητάδες,
όλον την ημέραν έχτιζαν κι από βραδύ’ χαλάουν.
– Ντο δίς ‘με πρωτομάστορα, και στέκει το γεφύρι;
- Αν δίγω ‘σε τον κύρη μου κι άλλο κύρην πα ‘κ̌’ έχω!
Όλον την ημέραν έχτιζαν κι από βραδύ’ χαλάουν.
– Ντο δίς ‘με πρωτομάστορα, και στέκει το γεφύρι;
- Κι αν δίγω ‘σε τ’ αδέλφα̤ μου, κι άλλο αδέλφα̤ ‘κ̌’ έχω!
όλον την ημέραν έχτιζαν κι από βραδύ’ χαλάουν.
– Ντο δίς ‘με πρωτομάστορα, και στέκει το γεφύρι;
- Κι αν δίγω ‘σε και τα πουλλά̤ μ’, κι άλλο πουλλά̤ πα ‘κ̌’ έχω,
όλον την ημέραν έχτιζαν κι από βραδύ’ χαλάουν.
– Ντο δίς ‘με πρωτομάστορα, και στέκει το γεφύρι;
- Κι αν δίγω ‘σε την κάλη μου, καλέτερον ευρήκω!
Μενύει ατο την κάλην ατ’ με τ’ άοικον το πουλλόπον.
- - Τη Σάββαν δέβα ‘ς σο λουτρόν, την Κερεκήν ‘ς σο γάμον
και τη Δευτέρα την πιρνήν αδά να ευρισκάσαι.
………………….. ατού ‘ς σο Δρακολίμν’, κάλη μ’,
ρούξεν τη κυρού μ’ το σ̌κεπάρ’ και άρ’ τ’ εμόν η φούντα
κι αν κολυμπάς και παίρτς ατο, είσαι τ’ εμόν η κάλη.
- Κι άρ ‘κ̌ι πονώ τα κάλλα̤ μου κι άρ’ ‘κ̌ι πονώ την όψη μ’,
πονώ και τ’ εμόν το πουλλίν τ’ εφέκα κοιμισμένον.
Κι αμόν τρομάζ’ν τα γόνατα μ’ να τρομάζ’ το γεφύρι,
κι αμόν το τρέχ’νε τα δάκρα̤ μ’ να τρέχ’νε οι δα̤βάτοι.
- Κι άρ’ σός, κάλη μ’ καλέτερε, βαρά̤ μη καταράσαι,
Κι άρ’ έχ̌εις κύρ’ ‘ς σην ξενιτά̤ν, ‘δέλφα̤ ‘ς σο γουρπελίκι.
Κι αμόν το στέκ’νε τα γόνατα μ’ να στέκη το γεφύρι,
κι αμόν ντο στέκ’νε τα δάκρα̤ μ’ να στέ’κνε κι οι δα̤βάτοι. Της Τρίχας το Γεφύρι. Ο Θρύλος του γεφυριού και ο συμβολισμός του στον Πόντο.