Νύφε και πεθερά, Τραγούδι του Ανατολικού Πόντου
Να (γ)ίνουσουν κατακλυσμός και χάσαν οι γραιάδες,
εκοίσαν κι' εκοιμούσαν-ε άφοβα οι νυφάδες.
Ίνας νύφε έναν ημέραν, 'μώ τη σ̌κύλ' τη θαγατέρα,
ταβίζ' με την πεθεράν ατς, ατέ χοβλαεύ' απάν' ατς.
Η νύφε 'ξέγκεν το τακούν' άτς, λέει την πεθεράν ατς: τσούνα!
το κιφάλι σ' άμον τ̌άς, εθαρείς 'κ̌ι' θα ψοφάς;
Επιάσταν 'ς σα μαλλία, εμαζεύτεν η γειτονία,
έρθεν ένας γείτονας, λέει ατένεν: ντο εφτάς;
λέει ατέν' : 'κ̌ι' εντρέπεσαι; γιατί κρού(ει)ς την πεθερά σ';
λέει ατόν' : εσύ ντό θέλτς; το σκυλίν θα γουρταρεύς;
λέει η πεθερά ΄ς ση νύφεν: μεσημέρ' έντον 'κ̌ι' ενύφτες,
ούσ' το μεσημέρ' κοιμάσαι, ας σο Θεό σ' 'κ̌ι' φογάσαι,
εγώ 'φτά(γ)ω τα δουλείας, θα τερώ και τα παιδία σ';
'ς ση κυρού σ' 'κ̌ι' είχ̌ες νερόν, αδά θέλτς και παραγιό.
Ομάλ' Καρσλίδικο - Νύφε και πεθερά, Δημώδες άσμα, Χρύσανθος Θεοδωρίδης
Τσ̌' είχ̌εν πεθερά καλέσα να 'χω κι εγώ η τυχερέσσα;
τα βουτούρτα τα τυρία, έειχ̌' ατα με τα κλειδία,
λάσ̌κεσαι άμον σουρτούκα σ̌κυλάζ' το βρακί σ' τσουλτούκα,
και η νύφε σ' η καημέντσα πάντα μαραγκουλιασμέντσα,
πάντα εφτάει υπομονή, τρώει κρομμύδια και ψωμίν.
Πεθερά τς' χατεύ' ατέν' έξ' ας σ' οσπίτ' λέει ατέν',
η νύφε 'σκώθεν πάει και παράπονον 'κ̌ι' εφτάει,
ξάν' η γούλα τς' επιάστεν για τη μάνα ν-ατς εχπάστεν.
Ας σ' εσούμωσεν ΄ς σο σπίτ-ν-ατς, ατέ είδεν την αδερφήν ατς,
αδερφή ατς εγροίξεν-α, τη μάνα-ν-ατς είπεν-α.
Η μάνα τς' εβγών' εξώκα, ερωτώ 'τεν πρώτα πρώτα,
νέτσ̌η ντ' έπαθες και κλαίς και τη μάνα σ' δεν 'κ̌ι' λές;
Σούμωσε τη μάνα-ατς εγονάτσεν εμπροστά τς'.
Μάνα ! λέει, ξάϊ μ' ερωτάς 'με, ποίσον ταρχανάν να φάεις 'μεν,
η πεθερά μ' έν' κακέσσα πάντα αφήν' 'με νηστικέσσα.
Γουρπάν εγώ ΄ς ση γούλα σ', μέρ' εφέκες την Τασούλα σ',
η Τασούλα έν' ΄ς σ' οσπίτ'ν'ατς, δικαιούτ'-α̤ το παιδίν-ατς.
Η πεθερά μ' έν' κακέσσα πάντα αφήν' 'με νηστικέσσα,
τσακών' κι εφτάει το φούστουρον και τρώει-α μαναχ̌έσα. Δημώδη άσματα Πόντου (Playlist)
Νύφε και πεθερά - Τραγούδι του Ανατολικού Πόντου - Απομαγνητοφώνηση : Βασίλειος Β. Πολατίδης
Ποντι(α)κή Ιστορία & Λαογραφία - Βασίλειος Β. Πολατίδης - www.kotsari.com
