Κρωμέτ'κα Τραγωδίας - Δημώδη άσματα Κρώμνης Πόντου αφιερωμένα στην Παναγία Σουμελά του κ. Δημητρίου Κ. Παπαδόπουλου Σταυριώτη.
Κρωμέτ'κα Τραγωδίας - Δημώδη άσματα Κρώμνης Πόντου αφιερωμένα στην Παναγία Σουμελά
‘Ση Σουμελά την Παναγιάν θα παίρω κοινωνίαν,
ν’ έρχουμ’ αρνί μ’ ελέπω ‘σε με καθαρόν καρδίαν.
Κρωμέτ΄κα Τραγωδίας 3ο - Για την Παναγία Σουμελά - Δημοτικά Τραγούδια Πόντου
Σουμελά λέν’ την Παναγιάν’ και σύ είσ’ η Σουμέλα,
ο άντρας σ’ πάει σην Σουμελάν, εσύ έλα με τ’ εμέναν.
Χαντζούκα μ’ τ’ ελατόκλαδα σ’ κρύφτ’νε την Παναγίαν
κρύφτ’νε την κόρην π’ αηγαπώ, και καίγ’νε την καρδία μ’.
Η δύσα εφέκεν το Μετζίτ κι εκάτσεν σα Καμμένα,
αηγάπη μ’ άφς τα κυρουκά σ’ και κάθ’κα με τ’ εμέναν.
Χαντζούκα μ’ για χαμέλενον, Καμμένα μ’ κα ελάτεν,
φογούμαι το μικρόν τ’ αρνί μ’ σην δύσαν να μη χάται.
Κορτσόπον φόρ’ κι ανάλλαξον κι άμε σην Παναγίαν
σ’ ορμάν’ θα ενταμώνωμε, φιλούμες άλλο μίαν.
Έλα αρνόπο μ’ με τ’ εμέν’ ση Σουμελά ας πάμε,
μ’ αφήντς ‘με μόν’ και μοναχόν κι απέσ’ σ’ ορμάνα̤ χάμαι.
Σην Σουμελάν εγνώρτσα ‘σε, κι εσέβες σο καρδόπο μ’,
ση Κρώμ’ άλλον εγάπεσες, και έκαψες το ψ̆όπο μ’.
Ση Σουμελά την Παναγιάν θ’ άφτω έναν κερόπον,
να δει φώτισιν σο γιαβρί μ’ και έρται σ’ εγκαλόπο μ’.
Ση Παναγίας το ποτάμ’ εσκώθεν χαλαρδία,
εποταμά̤γαν τα ραχ̆ά̤ κι εχάθαν τα χωρία.
Τη Σουμελάς το Μοναστήρ’ εβζύεν κι εχαλάγεν,
η Παναγία ‘πέταξεν σα λίβα̤ εταράγεν.
(Στίχοι Φίκα)
Αχπάσκουμαι ‘ς σην Παναγιάν ‘ς ση Σουμελά θα πάγω
και για τ’ εσέν’ παντέμορφον τα παλαλά ντ’ εφτάγω.
Αέρη μ’ κι Αε-Θόδωρε μ’, Σουμελά Παναγία!
εμέν’ να δίτε υπομονήν, τ’ αρνί μ’ καλλιγνωμίαν.
Κρωμέτ'κα Τραγωδίας - Δημώδη άσματα Κρώμνης Πόντου (Δημητρίου Κ. Παπαδόπουλου Σταυριώτη). Λαογραφικόν Περιοδικόν Ποντιακή Εστία (1950). Στην ενότητα αυτών των βίντεο με τίτλο "Κρωμέτ΄κα Τραγωδίας" θα παρουσιαστούν παλιά δίστιχα της Κρώμνης, αφενός για να θυμηθούν οι παλιότεροι και αφετέρου για να μάθουν οι νεότεροι, ώστε να πατούν προσεκτικά πάνω στα βήματα των προγόνων, υιοθετώντας τον τρόπο σκέψης και γραφής των παραδοσιακών μας δημοτικών τραγουδιών. Ποντιακός Παραδοσιακός στίχος - Παραδοσιακά δημώδη άσματα των Ελλήνων του Πόντου
Ποντι(α)κή Ιστορία & Λαογραφία – Βασίλειος Β. Πολατίδης – www.kotsari.com
