Το Νυφέπαρμαν. Η ποίηση στη Σαντά (Σάντα) του Πόντου. Στ. Αθανασιάδη. Ποντιακή Εστία 1950
Το Νυφέπαρμαν
Σήμερον μαύρος ουρανός, σήμερον μαύρ’ ημέρα,
σήμερον θα χωρίεται μάνα και θυα̤γατέρα,
οσήμερον το κόρασ̆ον δύο καρδόπα έχει,
τ’ έναν αφήνει ση κυρού και τ’ άλλο παίρ’ και πάγει
οσήμερον το κόρασ̆ον δύο πορτόπ’ ανοίγει
τ’ έναν ανοίγει και εμπαίν’, τ’ άλλο ‘σπαλεί και πάγει.
Άφ’σον κόρη την μάνα σου και ποίσον άλλεν μάναν,
άφ’σον κόρη τον κύρη σου και ποίσον άλλον κύρην.
Άφ’σον κόρη τ’ αδέλφια σου και ποίον άλλ’ αδέλφι͜α.
Ντο είχ̆ες κόρη μ’ έργευες ντο είχ̆ες κ’ εργοπόρνες;
Είχα τον κύρη μ’ τον καλόν και χωρισι͜αν ‘κ̆ επαίρνα.
Ντο είχ̆ες κόρη μ’ έργευες ντο είχ̆ες κ’ εργοπόρνες;
Είχα την μάνα μ’ την γλυκιάν και χωρισίαν ‘κ̆’ είχα.
Κόρη ντο είχ̆ες κ’ έργευες ντο είχ̆ες κ’ εργοπόρνες;
Είχα τ’ αδέλφι͜α μ’ τα καλά και χωρισίαν ‘κ̆ είχα.
Τίμα κόρη τη πεθερά σ’ να είσαι τιμεμέντσα,
τίμα κόρη τον πεθερό σ’ να είσ’ αγαπημέντσα.
Κόρη μάθα την αγρυπνιάν και την κακοπειρίαν
αύρι’ θα πάς ση πεθερού σ’ να είσαι μαθεμέντσα.
Μακρύν σ̆κοινίν μη δίτ’ ατέν ‘ς σα ξύλα μη απολύτ’ ατέν’,
η κόρ’ εντροπα̤ρία έν’ φορτούται όλεν τ’ όρος.
Τρανόν σταμνίν μη δίτ’ ατέν ‘ς σο νερόν μη απολύτ’ ατέν’,
η κόρη εντροπα̤ρία έν’ τσουρώνει το πεγάδι΄
Η ποίηση στη Σαντά (Σάντα) του Πόντου. Στ. Αθανασιάδη Πηγή: Ποντιακή Εστία 1950 Σαντά (Σάντα - Dumanlı, Gümüşhane) Ιστορία Λαογραφία Πολιτισμός. Χωριά, Τοπωνύμια, Ήθη, Έθιμα, Χοροί, Θρύλοι, Παραδόσεις, Πρόσωπα.
Περισσότερες αναρτήσεις μου για το Νυφέπαρμαν σε διάφορες περιοχές του Πόντου: Το Νυφέπαρμαν στη Νικόπολη του Πόντου – Αναστασίας Καμπουρίδου Αρχείον Πόντο 1981 - Το νυφέπαρμαν στο Ορτάκιοϊ του Κάρς Παύλος Ιωαννίδης Σίμος Λιανίδης Λευκώνας Σερρών 1967 - Διήμερα Τριήμερα, Τ' ορφανέσσας το νυφέπαρμαν - Χρύσανθος - Κουγιουμτζίδης & Ευσταθιάδης - Νυφέπαρμαν & Ομάλε τη Νύφες, Μαντηλικά Καϊτέδες Γαρέσαρης Πόντου, Σπύρος Γαλετσίδης 1998 - Νυφέπαρμαν Ομάλε τη Νύφες Νικόπολης Πόντου - Σπύρος Γαλετσίδης, Ζουρνά - Χάραξεν η ανατολή, δημώδες γαμήλιο άσμα Πόντου, Νυφέπαρμαν - Νυφόπαρμαν
Ποντιακή Ιστορία & Λαογραφία – Βασίλειος Β. Πολατίδης – www.kotsari.com