Αν αποθάνω. Δίστιχα περιφέρειας Σταυρίν. Χρονικά Πόντου - Τεύχος 10ο,- 1945 - Συλλογή Δ. Κ. Π. Σταυριώτη.

Σταυριώτες πρόκριτοι με τις επιχώριες παραδοσιακές τους ενδυμασίες 1900 Αν αποθάν’ αρνόπο μου πίασον σο κανόνι μ’
παίρ’νε και πάνε θάφτ’νε ‘με, θ’ απομέντς μαναχόν-ι.

Αν αποθάνω θάψτε ‘με, αφκά σ’ έναν δεντρόπον,
ρούζ’ εβόρρα ‘θε σο ταφί μ’ κι ευτάει ‘με σ̆ενλικόπον.

Δίστιχα περιφέρειας Σταυρίν (Αν αποθάνω)

Αν αποθάνω θάψτε ‘με, και σ’ άνθεν τον Παρχάρη,
όλ’ πάν’ λέπ’νε το μνήμα μου και παίρ’νε το χαπάρι.

Αν αποθάνω θάψτε ‘με και ση Σταυρί’ το χώμαν,
κι η κασσέλ’ ας έν’ ανοιχτόν μη θέκετ’ α̤πάν’ πώμαν.

Αν αποθάνω θάψτε ‘με με τα μοιρολοϊας,
τα δάκρα̤ ντο θα ξ̆ύουνταν να γίν’νταν ευλοϊας.

Αν αποθάνω θάψτε ‘με σ’ έναν ποταμί άκραν
να παίρ’ τα στούδα̤ μ’ το ποτάμ’ και πάει σα θαλασσάκρα̤.

Αν αποθάνω θάψτε ‘με ση θάλασσας το γούμι,
να κρούει η θάλασσα ταλγάν και φέρ’ ‘με σο Σοχούμι.

Αν αποθάνω θάψτε ‘με σ΄έναν ψηλόν βουνόν-ι,
να ελέπω επεκειαπάν’ τ’ αρνί μ’ κάθαν πουρνόν-ι.

Αν αποθάνω κάλη μου μ’ ευτάς υπομονήν-ι,
τέρεν κι έπαρ’ άλλον άντραν, μη σύρτς την καμονήν-ι.

Αν αποθάνω μάννα μου θάψτε ‘με ση Καλλέα,
αγρείμαι ολομάναχος, βαλέστε με βαθέα.

Αν αποθάνω μάννα μου θέκ’νε μ’ απάν’ ση σκάλαν,
αν θέλτς κλάψον, αν θέλτς ‘ματού, αν θέλτς τον κόσμον χάλα.

Αν αποθάνω μάννα μου, θέλω ξαϊ να μη κλαίς ‘με,
τα τά̤ρτα̤ σ’ και τα βάσανα σ’ μη κάθεσαι και λές ‘με.

Αν αποθάνω μάννα μου φόρ’ το μαύρον το τσ̆ίτι σ’,
να δί σ’ ο Θός υπομονήν εκκολίεν τ’ οσπίτι σ’.

Αν αποθάνω ξάϊ μη κλαίς και μη τρώς την καρδία σ’,
κλάψο μ’ α̤τώρα ζωντανόν και φτούλτσον τα μαλλία σ’.

Δίστιχα Σταυρίν - Πηγή: Χρονικά Πόντου - Τεύχος 10ο - 1945 - Συλλογή Δ. Κ. Π. Σταυριώτη. Αν αποθάνω θάψτε 'μεν / Δημώδες Άσμα Τραπεζούντας Πόντου / Φάρος Ποντίων / Χορός Διπάτ' - Αν αποθάνω θάψτε 'μεν - Μακρύν Ματσούκας - Ανέστης Κοροσίδης

Ποντιακή Ιστορία & Λαογραφία – Βασίλειος Β. Πολατίδης – www.kotsari.com 

Pin It

Print

Add comment


Security code
Refresh

ΣΧΕΤΙΚΑ ΑΡΘΡΑ