Δημοτικά τραγούδια Πόντου. Πηγή: Μηνιαίον Λαογραφικόν Περιοδικόν “Ποντιακή Εστία”. Τεύχος 30-31 Ιούνιος Ιούλιος Θεσσαλονίκη 1952.
Το Νερόν
Κορτσόπον δωδεκάχρονον δός ‘με νερόν ας πίνω.
Αφέντη μ’ ‘κ̆’ έχω μαστραπάν, ‘κ̆’ έχω αργυροκαύκιν,
αν θέλ’τς και καταδέχεσαι πία ‘σο χαλκοστάμνιν.
Δημοτικά Τραγούδια Πόντου. Λαϊκή Παραδοσιακή Ποντιακή Μούσα
Τα χ̆είλ’ ατ’ είναι ‘ς σο σταμνίν τ’ ομμάτα̤ τ’ είν’ ΄ς σην κόρην.
Τερεί την κόρ’, τερεί την κόρ’ μουδέ ‘σπλαχνίαν έχει,
ανάμεσα ‘ς σ’ οφρύδα̤ της μελεσσιδόπα κάμνε.
Και κάμνε μέλι και κερίν και δωναρί σκουτάρι.
Το μέλ’ ας τρών’ε άρχοντοι και το κερίν ούλ’ άγι͜οι.
Το μέλ’ έν’ παντού – παντού κι εσύ ‘σαι πάντα – πάντα.
Έταιρα ολιγόστιχα
Εχάλασα τ’ οσπίτι μου κι εποίκα χαμελέτεν,
ελάτε καλά κόρασα̤ ‘ς σ’ εμόν την χαμελέτεν,
αλέθω και σακίζω σας κι εσάς καπίτς ‘κ̆ι παίρω.
Έπαρ’ ‘με κόρη έπαρ’ ‘με, μ’ εθαρρείς γέρος είμαι,
‘ς ση χαμελέτεν έλεθα τα γένε͜ια μ’ ελευρώθαν,
εκλίστα κά’ να πλύν’ ατά, ερούξα κι εφουρκίγα.
Ούλ’ περμένε την Άνοιξην κι η κόρ’ το Μοθοπώρι,
τ’ άνθα̤ ανθούν την Άνοιξη, κι η κόρ’ το Μοθοπώρι.
Έχ̆’ κι έρται η τρυγόνα μου κι εμόρφιναν τα στράτας,
κι άρ’ τ’ έμπρ’ τα στράτας χ̆αίρουνταν, τ’ οπίσ’ αναστενάζ’νε.
Δημοτικά τραγούδια Πόντου. Πηγή: Μηνιαίον Λαογραφικόν Περιοδικόν “Ποντιακή Εστία” τεύχος 30-31 Ιούνιος Ιούλιος 1952. Εκδότης: Φίλων Κτενίδης, Θεσσαλονίκη.
Ποντιακή Ιστορία & Λαογραφία - Βασίλειος Β. Πολατίδης - www.kotsari.com
