Η προκομμέντζα η νύφε - Αφήγηση απ' την Ίμερα Αργυρουπόλεως Πόντου
Εις μνήμην των υπέρ Πίστεως και Ελευθερίας θανόντων Ελλήνων εκ Πόντου.
Ένας γέρος κι' είνας γραία είχαν έναν παιδίν και μαναχόν, άμα εκείν' επαραγέρασαν κι' εσέβεν άνεμον 'ς σα μέσα 'τουν κι άλλο 'κ̌' επόρ'ναν να συγκλίσκουνταν. Αέτσ' πα εγυναίκ'σαν το παιδίν ατουν μικρόν μικρόν ν' ευτάει η νύφε τα δουλείας. Αρ' εποίκαν τη χαράν κι' εγλύτωσαν και τον πουρνόν αναμέν'νε να σ'κούται η νύφε ευτάει τα δουλείας, άμα η νύφε ξάϊ επεκεί 'κ̌' εδέβεν.
Εκείν' πα εθάρεσαν ατζ̌αμήσα έν' και πολλά 'κ̌' εκακοφάνθεν ατ'ς. Έρθεν και τ' άλλο ο πουρνός και ξάν' η νύφε ολόερα 'κ̌' ετέρεσεν. Αέτσ' πα εδέβαν περ'σσά ημέρας και η νύφε δεν 'κ̌' εποίν'νεν, έτρωεν κι' ελάσκουτον. Ετέρεσαν κ' εκείν' πως αέτσ' 'κ̌ι' θα 'ίνεται, ερχίνεσαν ν' ευτάν' ατα εκείν', με τον νούν ατουν θ' ελέπ' α̤τα κι εντρέπεται και θα παίρ' α̤τα ας σα χ̌έρια̤ 'τουν. Δείτε το σχετικό βίντεο για την Ίμερα Αργυρουπόλεως Πόντου // Δείτε το σχετικό βίντεο για την Ίμερα του Πόντου. Άμον τ' επέρεν ο γέρον το φορκάλ' κι΄ εκλίστεν κά να σπογγίζ', έρθεν ο πόνος εσέβεν 'ς σα μέσα τ' κι άλλομίαν εσπίχτεν κι' εβάρκιξεν. Έτρεξεν η γραία να παίρ' ατο ας σα χ̌έρια̤ τ' κι ο γέρον πα τεά 'κ̌' εθέλ'νεν να δί' ατο 'κεί. Αέτσ' πα ερχίνεσαν να κρούν και να παίρ'νε απάν' ΄ς σο φορκάλ'. Η νύφε πα έναν ζαμάν ετέρεσεν ατ'ς κι επεκεί επουγαλεύτεν, έτρεξεν επέρεν το φορκάλ' ας ση γέρονος τα χ̌έρια̤,εσέγκεν ατο απέσ' 'ς ση γραίας και είπεν ατ'ς: « μέτα, για το σπόγγιμαν θα τοουσ̌εύετε ; .... μίαν εσύ και μίαν ατέ !!! »
Πηγή: Επιτροπή Ποντιακών Μελετών "Αρχείον Πόντου" † Ανθίμου Παπαδόπουλου "Ιστορική Γραμματική της Ποντιακής διαλέκτου".
Ποντιακή Ιστορία & Λαογραφία - Βασίλειος Β. Πολατίδης - www.kotsari.com
