Ο ποπάς καί τό κολονκύθ (Mατσούκας Πόντου) Συλλογή Άννας Νεοφυτίδου
Ὁ ποπᾶς καὶ τὸ κολονκύθ. (Mατσούκας) Συλλογὴ Άννας Νεοφυτίδου
Σὴ Μάτσκας τὰ ταράφ͜ια ἔτον ἕνας ἀγράμματος ποπᾶς. Γιὰ νὰ θυμᾶται τὰ ἡμέρας τῆ Σαρακοστῆς ὄνταν ἐρχίνευεν ἡ νεστεία ἐβάλνεν κάθαν χρόνον ἀπὲς σ’ ἕναν εὔκαιρον κολονκὺθ 48 φάβατα καὶ κάθαν πρωῒ ἐβγάλνεν ἕναν. Ὄνταν ἐτελείωναν τὰ φάβατα ἔρχουτον ἡ Λαμπρή, κι ὁ ποπᾶς ἐποίνεν τὴν Ἀνάστασιν.
Ἀρ’ ἕναν χρόνον τὴν Σαρακοστὴν ὁ καντηλανάφτες, π’ ἔτονε κι’ ὀλίγον μασχαρ͜ιάνος, ἐνοῦντσεν νὰ παίζ’ ἕναν δουλείαν σὸν ποπᾶν. Ἀσὸ ἐπέρασαν τρία ἑβδομάδας τῆ νηστείας ἐπῆρεν ἕναν βοῦραν φάβατα κ’ ἔσυρεν-ἀτα ἀπὲς σὸ κολονκύθ. Ὁ ποπᾶς τιδὲν κ̆’ ἐγροῖξεν. Κάθαν πρωῒ ἐβγάλνεν ἀπ’ ἕναν φάβατον, ἅμα τ’ ἀφωρισμένα τ’ ὀπίσ’-άτουν κ̆’ ἔρχουτον.
Οἱ χωρὲτ τεροῦν ἡ νεστεία πολλὰ ἐμάκρυνεν, κ̆’ ἔτονε νὰ τελέν.
Γονατοκλισίας καὶ μετάνοιας κάθαν βράδον σὴν ἐκκλησίαν. Ἐνεγκάστανε.
Κ’ ἕναν ἡμέραν κάποιος ἐρώτεσεν τὸν ποπᾶν:
— Πάτερ, νὰ ἔχω τὴν εὐχ̆ή σ’, πότε θὰ ἐφτᾶμε Ἀνάστασιν;
— Ὁ Κολονκυθᾶς ὅμπως λαλεῖ, ὀφέτος Λαμπρὴν κ̆ὶ θὰ φτᾶμε.
Λεξιλόγιο:
• Ταράφια = τὰ μέρη / μασχαριάνος = ἀστεῖος / βοῦρα = φούχτα / φάβατα = κουκκιά / τ’ ὀπίσ’-άτουν κ̆’ ἔρχουτον = φρ., δὲν ἐτελείωναν.
Στο παραπάνω κείμενο έχει διατηρηθεί ο αρχικός τύπος γραφής και δημοσίευσης σε πολυτονικό. Πηγή: Ποντιακά Φύλλα 1937
Διαλεκτολογία Πόντου – Ιστορία & Λαογραφία – Βασίλειος Β. Πολατίδης - www.kotsari.com
