Λαογραφικά Γλωσσικά Σύμμεικτα Καρακεβεζήτ Γαράσαρης
Οι Πακαταράντ'
Εμάς λέγ'νε μας Πακαταράντ'. Γιατί;
Γιατί ο παππού μ' έτον κυνηγός. Οι Τρούκ' επέ(γ)ειναν ΄ς σο κυνήγιν, επέρειναν κ' επέ(γ)ειναν και τον παππού μ'. Εείνος πα καλά 'ρίχνεν, «έΐ ατάρ'» (καλά σύρ'), από κει έμεινεν Πακατάρ', Πακαταρίδης, κουρφιμένον.
Πηγή: Γιάννες Πακαρατίδης γεννηθείς το 1895 στο Καρακεβεζήτ Νικοπόλεως, κάτοικος Ελαιοχωρίου Καβάλας
Η Γαράσαρη και τα Είκοσι Οκτώ Χωριά της: Καρα κεβεζίτ, Μπάτζανα & Τρουπψή ΣΤ΄ Μέρος
Ευτράπελη διήγηση με τίτλο: "Λούραν ας εμαθάν'νες"
Πήγαν 'ς σο χορόν, χόρευανε, ο λουρουντσής εγονάτιζεν εμπροστά 'τουνε κ' εδίν'ναν άλλος πέντε παράες, άλλος δέκα παράες. Οι ποπάδες γαρσού έσαν κ' ετέρειναν και λέει : «Κούμπαρε, κούμπαρε !...»
« Ντό έν';»
« Γράμματα το να μαθάν'νες, καλλίον λούραν ας εμαθάν'νες!..Τέρεν ακεί ντο 'ίνεται!
Πηγή: Σάββας Πακαταρίδης
Άλλη διήγηση με τίτλο: "Επλάγιασαν 'ς σο χόνιν"
Τα σπίτια 'μουνε έταν μακρεά, τα μαντρία 'μουνε μακρεά. Δύο αδέλφια εδήβανε, τάϊσανε τα χαϊβάνια 'τουνε το βράδον και ήρθανε.
Χόνιν έτουνε μέχρι αδα.
Ο ένας έ σ κιζεν το χόνιν από μπροστά και άλλος από πίσω επέεινεν.
Είπεν ο πρώτος: « εκουράστα», «ολίγον πά εσύ σκίσον»
« Εγώ 'κι σκίζω! »
« Σκίσον κι εσύ»
« 'Κι σκίζω!..»
Και ας σο ινάτιν ατουνε επλάγιασαν 'ς σο χόνιν απέσ' και τον πιρνόν εδήβανε ΄ς σα σπίτια 'τουνε.
Πηγή: Σάββας Πακαταρίδης
Λεξιλόγιο:
Μακρεά = Μακριά
Χαϊβάνια = ζώα
Έσκιζεν = άνοιγε στα δύο
Ινάτιν = πείσμα, γινάτι
Πιρνόν = πουρνός, πρωΐ
Ποντι(α)κή Διαλεκτολογία - Ιστορία & Λαογραφία - Βασίλειος Β. Πολατίδης - www.kotsari.com
